Contos na radio

Os alumnos gañadores da actividade de reescritura de contos clásicos de 1ºESO de Proxecto Competencial acudiron á radio do instituto para gravar o seu relato, unha nova versión de Cinsenta creada desde unha perspectiva máis igualitaria e afastada dos estereotipos tradicionais.

O alumnado de 1ºESO durante a gravación de radio

Durante a gravación, axudados pola profesora Paula Rábade, o alumnado puido vivir a experiencia de participar nun programa de radio, poñendo voz ao seu conto e compartindo co resto da comunidade educativa o traballo realizado na aula.

Esta actividade foi unha oportunidade para fomentar a creatividade, a expresión oral e a reflexión sobre a importancia de construír historias nas que a igualdade e o respecto estean presentes.

Parabéns ao alumnado polo magnífico traballo e pola ilusión coa que participaron nesta experiencia!

 

Sesgos de xénero na IA

 O alumnado de 4º da ESO da materia de Intelixencia Artificial levou a cabo unha interesante investigación sobre os sesgos de xénero presentes nalgunhas das ferramentas de IA máis utilizadas na actualidade.

Ao longo do proxecto, os estudantes analizaron como diferentes sistemas de intelixencia artificial responden ante determinadas preguntas, peticións ou situacións relacionadas cos roles de xénero. O obxectivo foi reflexionar sobre como os prexuízos e estereotipos existentes na sociedade tamén poden aparecer nas tecnoloxías que empregamos no noso día a día.

A través desta actividade, o alumnado non só desenvolveu competencias dixitais e pensamento crítico, senón que tamén tomou conciencia da importancia de crear tecnoloxías máis xustas, inclusivas e respectuosas coa igualdade.

Infografías de mulleres ilustres

No marco da materia de Proxecto Competencial de 1ºESO, o alumnado do noso instituto realizou unha actividade centrada na visibilización de mulleres ilustres que deixaron unha pegada importante na historia, na ciencia, na cultura, no deporte ou na defensa dos dereitos sociais.

 

A través da creación de infografías, o alumnado investigou a vida e os logros de diferentes mulleres referentes, descubrindo as dificultades ás que moitas delas tiveron que enfrontarse para conseguir o recoñecemento do seu traballo. Ademais de desenvolver competencias dixitais e de investigación, esta actividade permitiu reflexionar sobre a importancia da igualdade de oportunidades e sobre a necesidade de dar visibilidade ás achegas das mulleres ao longo da historia.

 

As infografías elaboradas destacaron pola súa creatividade e polo compromiso do alumnado coa temática. Con esta iniciativa, seguimos traballando para fomentar valores de respecto, igualdade e recoñecemento da diversidade de referentes femininos na nosa sociedade.

 

Parabéns a todo o alumnado polo seu traballo e implicación!

Analizando as cancións de moda

O alumnado de música de primeiro de bacharelato está a estudar as letras de cancións actuais, analizando diferentes aspectos, en particular calquera cousa que se desvíe da igualdade de xénero.

O ritmo de "Motinha 2.0 (Mete Marcha)" de Emilia, Luísa Sonza e Dennis é imposible de ignorar: desde o primeiro tempo engancha e non te deixa estar quieto. Pero a letra xera debate: algúns a defénden porque frases como "mete marcha" ou "acelera" son puro empoderamento e liberdade sexual, mostrando ás mulleres como que controlan os seus desexos; outros critican que centrar a canción no corpo e no movemento converte ás mulleres en obxectos en lugar de protagonistas.

Motinha 2.0 (Mete marcha) - Videoclip oficial

En definitiva, podes deixarte levar polo ritmo... pero tamén paga a pena pensar en que mensaxe estamos a cantar mentres bailamos.

Esclava Remix - Videoclip oficial

La Jeepeta Remix - Videoclip oficial

Reescribindo os contos clásicos: igualdade ecreatividade en 1º da ESO

Durante a primeira avaliación, o alumnado de 1º da ESO participou nun proxecto competencial no que combinamos lectura, pensamento crítico, creatividade e expresión oral a través da radio escolar.

O punto de partida foi a lectura e escoita compartida de fragmentos de contos clásicos, que nos serviron para reflexionar en grupo sobre os personaxes e os seus comportamentos. A través de preguntas sinxelas —quen aparece na historia?, como se comportan as mulleres e os homes?, que papeis desempeñan?— o alumnado foi detectando estereotipos de xénero moi presentes nestes relatos tradicionais: princesas pasivas, príncipes salvadores, bruxas malvadas…

A partir desta análise inicial, cada grupo escolleu un conto clásico (como Caperucita Vermella, Brancaneves ou A Bela Dormente) e realizou un traballo máis profundo de análise dos personaxes e dos roles de xénero: quen protexe, quen manda, quen obedece e que estereotipos podían transformarse.

O reto principal foi a reescritura do conto, dándolle a volta á historia para crear versións máis xustas e actuais. As novas historias tiñan que cumprir algúns requisitos como que as protagonistas debían ser activas e tomar decisións, evitando así a repetición de estereotipos de xénero.

Benvida ao blog

 Dámosvos a benvida ao blog da Comisión de Igualdade do IES Sanxillao, un espazo creado para compartir, reflexionar e traballar pola igualdade e o respecto dentro da nosa comunidade educativa.

Este blog foi creado polo alumnado de TIC de 2º de Bacharelato, que participou activamente no seu deseño e posta en marcha como parte do seu proceso de aprendizaxe. Grazas ao seu traballo e implicación, hoxe contamos cunha ferramenta que será de todas e todos.

Neste blog compartiranse as actividades que se vaian realizando para traballar a igualdade en todos os cursos do centro, visibilizando as iniciativas, proxectos e accións que se leven a cabo ao longo do curso para promover unha educación máis xusta, inclusiva e respectuosa.

Este é só o comezo dun proxecto colectivo no que cada achega conta. Agardamos que este espazo sirva para aprender, expresarnos e construír xuntas e xuntos un centro máis xusto e inclusivo.