A tradición non pode xustificar a inxustiza: unha reflexión crítica sobre a situación da muller

 
Este proxecto foi desenvolvido polo alumnado de 3º da ESO na materia de Francés  (segunda lingua estranxeira) durante o segundo trimestre, no marco do programa Proxecta 365 de Igualdade. O traballo centrouse na análise da situación da muller ao longo do tempo  e en diferentes contextos culturais. 

O punto de partida foi a lectura da obra Le tour du monde en 80 jours de Xulio Verne, que  permitiu ao alumnado achegarse a unha visión crítica dos roles femininos presentes na  literatura clásica, ao tempo que reforzaba a competencia lingüística en lingua francesa. 

Posteriormente, o alumnado asistiu á representación teatral desta obra no Auditorio  Gustavo Freire, enriquecendo a experiencia ao trasladar a reflexión ao ámbito escénico.  A través do personaxe de Aouda e da representación da práctica da sati, xerouse un  espazo de debate e análise na aula. Estas situacións leváronnos a cuestionar ata que punto  determinadas tradicións serviron —e nalgúns casos seguen a servir— para xustificar  desigualdades, estereotipos de xénero e distintas formas de violencia contra as mulleres. 

O alumnado reflexionou sobre a vixencia destas problemáticas na actualidade, identificando  exemplos contemporáneos e desenvolvendo unha mirada crítica fronte ás inxustizas que  persisten en nome da tradición ou da cultura. 

Este proxecto contribuíu a fomentar valores de igualdade, respecto e pensamento crítico,  promovendo unha educación comprometida coa erradicación da violencia de xénero e coa  construción dunha sociedade máis xusta e igualitaria.